Información xeral
Empresas elaboradoras
Receitas
Prego de condiciónsValdeorras, comarca situada na parte nororiental da provincia de Ourense, está moldeada por un profundo val fértil e luminoso polo que discorre, apracible, o río Sil, señor dunha paisaxe máxica, de terras vermellas e negras, onde medran o castiñeiro, a vide e a oliveira.
En Valdeorras homes e mulleres conseguiron unir esforzos, tradición secular e modernidade para manter a orixe e garantir a calidade duns viños que son a máxima expresión do sentir dunha terra.
Medio Natural
As zonas de produción ocupan gran parte das cuncas dos ríos Sil, Xares e Bibei.
As características dos diferentes solos da zona xeográfica, sumadas ás condicións climáticas, con baixas precipitacións e temperaturas extremas, conforman un ecosistema selectivo ao que se foron adaptando as variedades de vides presentes, en xeral variedades autóctonas seleccionadas ao longo do tempo.
O factor humano ten unha gran relevancia na selección varietal. Pero tamén é de gran importancia nas características destes viños a súa actuación ao longo da xa dilatada historia da viticultura da comarca no concernente á selección dos terreos coas mellores condicións de solo e orientación, terreos nos que en moitas ocasións houbo que construír muros para cultivar a vide en chanzos (bancais ou socalcos) para evitar a perda de solo e facilitar as prácticas de cultivo, dando lugar en moitos puntos da comarca a fermosas paisaxes vitícolas. Tamén é de destacar o coidado e mestría cos que os viticultores realizan ditas prácticas de cultivo, en particular a poda e condución das plantas para un adecuado control do potencial vitivinícola. Se a iso sumamos unha elaboración que, respectando a tradición, emprega os recursos que a moderna tecnoloxía enolóxica pon ao dispor dos elaboradores e uns rigorosos controis de calidade, o resultado son uns viños cunha gran personalidade e calidade, cada vez máis recoñecidos polos consumidores.
Materias primas
+
As variedades de uvas empregadas son:
- Brancas: Albariño, Loureira, Treixadura, Godello, Dona Branca, Torrontés, Lado e Palomino
- Tintas: Mencía, Brancellao, Merenzao, Tempranillo, Sousón, Ferrón, Caíño Tinto, Garnacha Tintureira, Mouratón, Gran Negro e Espadeiro
Características do produto
+
Dentro dos viños brancos destaca a variedade Godello. É un viño elegante, de fino aroma afroitado, cor amarelo rosado ou pallizo, con boa estrutura en boca, graduación alcohólica media duns 12,5º, delicados, ben estruturados, estables e de retrogusto completo.
Dentro dos viños tintos sobresaen os monovarietais a base de Mencía. Son viños de intenso cor púrpura e elegante aroma froital, cheos de lixeireza, con bo equilibrio alcohol-acidez, apetitosos e de retrogusto intenso e prolongado.
