Información xeral
Empresas elaboradoras
Receitas
Prego de condiciónsPara entender a especificidade do produto no seu conxunto, hai que considerar o factor humano. Os gandeiros galegos coa súa experiencia, o seu saber tradicional e o seu bo facer en todo o relativo a técnicas de cría e engorde, alimentación e manexo do gando, son o elemento definitivo sobre o que se sustenta a produción de carne de calidade de vacas e bois en Galicia. Grazas aos seus coñecementos agropecuarios, transmitidos de xeración en xeración, reservan os mellores pastos e forraxes para o engorde e acabado das reses, optimizan os recursos e seleccionan os mellores animais para producir carne de calidade.
Actualmente, esta carne forma parte do segmento de carnes selectas e está considerada entre as mellores do mundo, tanto a nivel de carnicerías delicatessen como da alta cociña de múltiples países.
Medio Natural
O ámbito xeográfico de produción e elaboración da carne da IXP Vaca Galega / Boi Galego abrangue a totalidade do territorio de Galicia.
O nacemento, cría e engorde, así como o sacrificio dos animais, o despezamento das canles e a maduración, realizaranse na área xeográfica definida, para preservar a especificidade e controlar as condicións de obtención do produto e a súa trazabilidade.
O relevo e orografía galegos son moi variados, predominan os outeiros suaves e as montañas baixas, mesturados con pequenos e abrigados vales que permiten o pastoreo ao longo do ano, atravesados por multitude de ríos.
En xeral, Galicia ten un clima tépedo, de marcada influencia oceánica, que favorece a riqueza da cuberta vexetal e son fundamentais para a produción de forraxes abundantes e de calidade.
As condicións orográficas, edafolóxicas e climatolóxicas, a subministración natural e a composición química das augas, a especificidade florística galega e o elevado valor agronómico das súas poboacións pratenses autóctonas confiren a Galicia unhas excelentes condicións para a actividade gandeira e para a produción de carne de vacún de calidade, como se puxo de manifesto ao longo da historia.
Materias primas
+
Esta carne obtense de vacas e bois das principais razas existentes en Galicia: Rubia Galega, Morenas Galegas (Cachena, Caldelá, Frieiresa, Limiá e Vianesa), Asturiana dos Vales, Limusina, Rubia de Aquitania, Frisona e Pardo Alpina, xa sexa en pureza ou cruzadas entre si.
Segundo o sexo, a idade e o sistema de produción antes do sacrificio, distínguense os seguintes tipos de animais:
a) Vaca: femia que tivo polo menos unha xestación antes do sacrificio.
b) Boi: macho castrado antes do ano de vida e que supera os 48 meses de idade ao sacrificio.
Características do produto
+
Vaca galega: esta carne é de cor vermella a vermello cereixa, marmoleada e infiltrado fino, con graxa de cor entre branco cremoso e amarelado, de textura firme e gran consistente ao tacto.
Boi galego: esta carne é de cor vermella a vermello púrpura, cun marcado infiltrado, graxa de cor entre branco nacarado e amarelo, de textura firme e gran consistente ao tacto.
